I dem Bricht geits um d Jugi Knaben, weg dr eifachheit u gwohnheit hie nume ging als „d Jugi“ gnennt.
Mir si am 14. Ougste 2020 i ds nüiie Jugijahr gstartet. Mir hei drüü nüii Mitglieder dörfä begrüäsä u hei mit insgesamt 35 Buebe gstartet.
Am 20. September hei 7 Giele und ei Leiter ar Swisstrailtour resp. am Kinderlouf am Namitag mitgmacht. mitgmacht. Äs si all 7 Giele super gloffe. Für d Jugi hets 2 dritti Plätz gäh.
Dür di behördliche Uflage wägem Coronavirus, hei mir na de Herbstferie kei MZH meh zur Verfüegig gha. Mir Leiter si aber der Meinig gsi, dass Bewegig ar frische Luft ds Immunsystem stärkt. U genau das brucht me ja i sore «Pandemie». Da aber ou äs Versammligsverbot für Gruppene vo meh als 15 Persone gulte het, hei mir Jugileiter innerhalb vo 2 Stund uf üsere Jugisite äs Amäldeformular uf d Bei gstellt. Mir hei üs zu däm Zitpunkt jewils i 2 Gruppe bim Werkhof troffe u hei üs bim Seeli ustobet. We ds Wätter nid het mitgmacht, hei mir ds Parkhuus vor Gondebahn Betelberg dörfe bruche. Äxtra für die Aktione het mir 2 Akkuschinwärfer ikouft, so dass mir ou einigermasse mit Liecht öpis verusse hei chönne mache. Gueti Chleider u ä Stirnlampe hei i dere Zit zur Standardusrüstig ghört. Das ganze Theater mit verusse turne het bis u mit dr Jugiwienachte stattgfunde.
Ou d Jugiwienachte isch hür chli anders gsi, si het am 11. Dezember 2020 stattgfunde. Mir hei se i däm Jahr i zwo Gruppe gmacht, dass wäg däm blöde Versammligsverbot vo meh als 15 Persone. Zersch heimer üs chli im Schnee ustobet, bevor mir ds traditionelle brätlä am Füür bim Länkerseeli gmacht hei.Dert hets für jede Giel Tee, Cevelats, Brot, u am Schluss no äs Chlousesäckli mit Mandarindli, Ärdnüssli und Schöggeli gäh.
Abem 15. Januar 2021 hei mir vor Gmeind Lenk wieder grüens Liecht übercho, dass mir hei i d Mehrzweckhalle chönne. Si isch na fasch 2.5 Mönet nümme gsperrt worde.
U drum hei mir üs ab däm Datum wieder ir MZH zum turne troffe. Leider het zersh für ali wo älter als ir 7 Klass si gsi no ä Maskepflicht bestande. Im Verlouf vom Februar isch di Maskepflicht när sogar usgwitet worde. Si het für ali wo älter als ir vierte Klass si gsi gulte. Nichts desto trotz si mir vo de Jungs sehr guet bsuecht worde i dere nid ganz eifache Zyt.
Am 22. Januar 2021 het üses Spiel und Spass im Schnee stattgfunde. Mir hei üs wieder i 2 Gruppe bir Schanze mit Hangrutsche u Schneeballschlachte im Schnee ustobet.
Afangs März het dr Kanton Bern d Coronaschutzbestimmige u dermit o d Maskepflicht für ali unter 20i glockeret. Leider het d Gmeind Lenk vo däm nüt wöllä wüsse. U drum het ds Jugileiter Team im Name vom TV Lenk äs Gsuech a Gmeindrat gmacht, dass d Gmeind d Schutzbestimmige glich tuet handhabe wir dr Kanton. Und siehe da, öpä 2 Wuche später het d Gmeind Lenk iglänkt u d Schutzbestimmige ir MZH uf d Empfehlige vom Kanton apasst. Ob üses Gsuech ds Uslöser isch gsi, wüsse mir bis hüt nid.
D Chind hei sech ab däm Datum schlussändlich wieder freier ir Halle chöne Bewege. Fröide het gherrscht bi de Jungs.
Am 21. Mai 2021 heimer üse traditionelle Jugibike gmacht. Mir hei beid Gruppe zämägfasst u si zersch ä chlini Rundi dür ds Oertli ga dreie bevor mir i ds Eywäldli mitem Velo verschiedeni Spieli si ga spiele. Als Unterstützig het a däm Abig dr Noel Buecher mit ghulfe. Er isch ä langjährige Jugigiel, wo o Acht Jahr i sire Schuelzyt aktiv ir Jugi het mitgmacht.
Am Wucheend vom 05./06. Juni 2021 het ds Jahreshighlight üses Jugilager stattgfunde. Mir hei trotz nid am beste Wätterbricht am Fritigabig entschiede das Lager düredsfüre. Ou dank däm, das mir am Fritigabe no zum letschte Mal dr Lagerplatz gwächslet heit. U so heimer üs (12 Jugigiele u 5 Leiter) am Samstigmorge bim Bahnhof troffe. Di jüngere si vo da mitem Bus bis i ds «Ruffeli» gfahre u hei dert afah wandere. Di ältere si vom Bahnhof us richtig Vierschildhütte / Guggernäll i vorder Wyssebärg gloffe. Während dr Wanderig hets nume einisch grägnet u das nid öpä zwenig.
Mir si churz nachem Mittag bi üsem Lagerplatz itroffe. Dert heimer als erschts d Zält ufgstellt bevor mir mit üsere Houptaktivität vom Lager hei agfange. Mir hei T-Shirt bemale.
Ou üsi traditionelli Schoggibananae als zvieri hei nid dörfe fählä.
Am Abig heimer Burger gmacht. Ou das Znacht isch bi dä Jungs wieder super acho. :-)
Wo de d Sunne langsam het wöllä undergah, heimer gmerkt dass üses Holz nid für ds ganze Lager längt. U so simer mit de ältiste Jungs churz vorem Sunneuntergang no ga Holz sueche u isammle.
Pünktlich ufe Sunneuntergang simer zrugg bim Lagerplatz gsi. Währenddäm d Jungs dr Sunneuntergang bestunet hei, hei d Leiter mit Fackele «LENK» i Hang vor üsem Lagerplatz gschribe. So dass mes vo verschiedene Orte im Tal het chönne läsä. Um das Spekatakel festzhalte het dr Livio Fotos u Videos mit sire Drohne gmacht.
Am Lagerfüür hets na däm no üses Schoggicake als Dessär gäh, bevor langsam fasch alli Giele si ga liege.
Ä herte Chärn vo Jungs u eim Leiter si di ganzi Nacht düre wach gsi u heis gmütlich gha, am Lagerfüür.
Wo dr Tag langsam wieder isch erwacht, si o d Jungs langsam wieder us ihrne Zält fürecho. Churz na de 9ni hets üses Zmorge gäh. Bevor mir üse Zältplatz hei afah ufrume. Nam Ufrume heimer no ä Rundi «Stöcklä» gspielt. Bevors scho üses Zmittag gäh het. Mir hei zum Zmittag nomal üsi Grillstelle ibetrieb gno u hei brätlet.
Nam Brätlä heimer no dr Lagerplatz müese Fötzele bevor mir üsi Wanderig achi i d Matte hei under d Füess gno. Vo dert simer mitem Zug zrugg a d Lenk gfahre. Als Abschluss vo üsem Lager heimer am Restaurant Pinocchio no ä Bsuech abgstattet. Für jede Giel hets dert no ä feinä Coupe gäh.
Wo mir de dä hei gässe gha, isch üses Jugilager ou scho umi verbi gsi. D Jungs si müed aber glücklich bim Bahnhof dä Eltere übergäh worde.
Am 18.06.2021 heimer üsi Gastlektion dörfe gniesse. Dr Andreas Isler het üs a däm Abig ä Lektion Fuessball gleitet.
Am 25. Juni 2021 heimer üs zum letschte Mal i däm Jugijahr troffe. A däm Abig heimer ou üsi Jugiabgänger verabschiedet. Hür sis vier Stück gsi. Drüü vo dene si ganzi 9 Jahr ir Jugi gsi. U dr viert o no ganzi 8 Jahr am Stück.
Mit dere Lektion isch äs turbulänts Jugijahr ds Änd gange.
Näbem normale Turnbetrieb isch hüür o no viel gloffe. D Jugileiter hei am 14. Oktober 2020 ä TV Lenk gründet. Das usem Grund, wüll d Jugileiter ä gmeinsame Zuekunft mitem DTV nüm als konstruktiv erachtet hei. Planet wär gsi, das mir Jugileiter per 31.07.2021 üsi Leitertätigkeit zugunste vom DTV tüe niederlege. So dass mir gnue Zyt hei, üse nüii Verein uf d Bei ds stelle. Das heimer am DTV o so kommuniziert. Ihne het das aber nid passt, u so het dr Vorstand vom DTV im Januar 2021 entschiede d Jugileiter rückwirkend ufe Dezember 2020, usem DTV usdschliesse. Ds interessante a dere Gschicht isch eigentlich, dass d Jugileiter gar nie offiziell si i Verein vom DTV ufgnoworde.
Der Wächsel vo de Jugigiele i TV Lenk het dür die Aktion scho per 26. März 2021 stattgfunde u nid wi planet per 31.07.2021. U drum darf me sägä, das äs turbulents Jugijahr 2020/2021 z Änd geit. Äs Jahr wo aber d Jugileiter stärcher zämägschweisst het.
August 2021 / Dominik Buchs
