I dem Bricht geits um d Jugi Knaben, weg dr eifachheit u gwohnheit hie nume ging als „d Jugi“ gnennt.
Mir si am 16. Ougste 2019 i ds nüiie Jugijahr gstartet. Mir hei sechs nüii Mitglieder dörfä begrüäsä u hei mit insgesamt 40 Buebe gstartet.
Am 29. September hei 7 Giele und ei Leiter am ar Swisstrailtour oder früiie Iffigelouf/KUSPO-Run mitgmacht.
Am Namitag heimer mit 6 Buebe am Kinderlouf mitgmacht. Äs si all 6 Giele super gloffe. Für d Jugi hets 1 zweite Zweit Plätz u drü Dritt Plätz gäh.
Üsi traditionelli Jugiwienachte het am 06. Dezember 2019 stattgfunde. Mir si mit dä Giele vom Schuelhuus über d Gärbi, Müehlwäldli uf d Tüüfelsinsle gloffe. Dert hets für jede Giel Tee, Cevelats, Brot, u am Schluss no äs Chlousesäckli mit Mandarindli, Ärdnüssli und Schöggeli gäh.
Am 31. Januar het üses Spiel und Spass im Schnee stattgfunde. Mir hei Rugby oder Fuessball gspielt oder si ganz eifach am Hang ga rutsche. Äs isch ä sehr intensive Abig gsi.
Bis am 13. März hei mir üs ganz normal ir Mehrzweckhalle troffe u üs dert ustobet. Mi het scho ging öpis vo däm Coronavirus ghört. Ä normali Grippe oder o nid?!
Am 13. März het dr Bundesrat di besondere Lage beschlosse. Mir hätte no dörfe turne, da mir aber vor Gmeind dr Rat hei übercho, ds turne vorläufig abdsbräche, hei mir nar erste Jugigruppe ds Jugijahr vorläufig unterbroche. Dä Unterbruch isch fang bis am 08. Mai gange.
Am 27. Mai het dr Bundesrat kommuniziert, das gwüssi Lockerige u o grösseri Menscheasammlige wieder erloubt si.
D durchfüehrig vom Jugilager u o vom rästliche Jugijahr isch üs aber äs ds grosses Risiko gsi. U so hei mir ds Jugijahr ufene spezielli Art u Wys beändet.
Die drü Jugiabgänger wo zwöi Mal 9 u einisch acht Jahr ir Jugi si gsi, hei mir leider nid wie gwohnt chönä verabschiede. Mir hei ihne aber glich üsi traditionelli Urkund sowie ä Guetschin lah zuecho.
August 2020 / Dominik Buchs
D Jahresuswärtig wird im Jahr 2019/2020 nid düre gfüehrt, da si nid ussagechräftig wägem Corona wär.