Das Jugijahr 2014/2015 in Zahlen
I dem Bricht geits um d Jugi Knaben, weg dr eifachheit u gwohnheit hier nume ging als „d Jugi“ gnennt.
Mal e chli ä andere Jahresbricht, ds Jugijahr 2014/2015 i Zahle zerleit.
| 4 | Nüii Mitglieder hei mir am 15. Ougste 2014 dörfä ir Jugi begrüäsä, mir si mit gsamthaft 38 Giele gstartet. |
| 10 | Giele hei am 28. September 2014 am Iffigelouf/KUSPO-Run mitgmacht, für d Jugi hets 1 Sieg u 1 zweite Platz ghä |
| 2*5 | Täg, hei dr Livio u dr Säm zämä im Oktober 2014 ds Sumiswald verbrunge. Si hei dert dr Leiterkurs absolviert u d Abschlussprüäfige mit Bravour bestande. |
| 9 | Mal hei mir vor em Turnnamitag mit dr Jugi güäbt u üsi Minitramshow igstudiert. Ab de Herbstferie heimer für das 5 Mal di ältere u jüngere Giele zämä gno, so dass mir ds Gsamtprogramm hei chöne istudiere. |
| 15 | Stund vorem Turnnamitag, heimer ds Gfüähl gha, das üsi Musig zum Uftritt no nid ganz passt. (Gäll Martin…! J) Und so hei mir i churzer Zyt no 2 nüii Variantene zemegmischt. Nume 4 Stund bevors isch losgange hei mir üs definitv entschiede zu welne Lieder mir ufträtä. |
| 28 | Giele hei mir chönä motiviere wo am Turnnamitag si ufträtä. Vorem Uftritt am 15. November 2014 si si sehr nervös und ufgregt gsi. Si hei e geniale Uftritt heregleit. Dermit isch ä chaotischi Zit z`Änd gange. Mir Leiter hei ir Zyt vom Üäbä hüfig müäsä stränger si. Für d Giele isch das ständige wiederhole nid ganz eifach gsi… Am ganze Uftritt si 256 Element / Sprüng zeigt worde. Duret het das ganze ca. 6 Minute. |
| 7 | Abe i dem Jugijahr, hei mir mit Alternativprogramm verbrunge. Dr Bsuech uf dr Ischbahn u d Waldwienachte, wo mir uf dr Tüfelsinsle verbrunge hei, hei natürlich nid dörfä fählä. Derzue het natürli ou ds Spiel und Spass im Schnee zehlt. Im wittere simer amene Friti abe wieder ga Schwinge u amene Samstimorge a Betelberg ga schlittle. Ou hei mir 1 Abe mit dr Nadja Grünenwald u dr Sandra Teuscher verbrunge u so mal ds Aerobictanze usprobiert. Afangs Mai isch ds Anni Hübschi mit dr Marianne Hirschi üs ds Volleyspiele cho nächer bringe. Ds Bike wo ändi Mai wär planet gsi, heimer wegem schlechte Wetter leider müäsä absege. |
| 19 | Lenkergiele si am 22. März 2015 uf Langnou a ds Unihockeyturnier gange. Scho zum füüfte Mal si mir uf Langnou gfahre u hei dert am Unihockeyturnier mitgmacht. Zum erste Mal si mir mit 2 Mannschafte, ä älteri u ä jüngeri aträttä. Di jüngere si sehr nervös gsi, sie hei ds erste Spiel knapp u di andere zimli dütlich verlore u so si si ufem letschte Platz klassiert gsi. Ou wüll mir zum Teil mit zwöit Klässler hei müäsä gägä sächsteler atrette. Aber Spass het allne gmacht u mir wete ou i Zuekunft mitere jüngere Mannschaft uf Langnau reise. Är ältere Gruppe ischs dütlich besser gloffe, da si ou scho meh Erfahrig hei. Sie hei ali Spiel ir Qualirundi gwunne, bis uf ds Spiel gägä Lützlfüäh. Dür die gueti Bilanz si di ältere Lengger zum dritte Mal i Folg im Final gstande. Dert het wieder Lützlfüäh gwartet und ou i dem Spiel si di ältere als Verlürer vom Platz gange. Vilich ou wüll bi Lützlfüäh ä Spieler derbi isch gsi, wo ir U-19 Unihockeynati spielt, und normalerwiis schiins nid im TV sig… Namene erlebnisriche Suntig si mir müäd aber glücklich zrugg a d Lenk greist. |
| 32 | Stund het üses Jugilager duret. Das isch üses klare Jahreshighlight. gsi 12 Stund vorem Treffpunkt, si mir Leiter nomal dr Lagerplatz ga guge wies usgseht. Mir si sehr lang im ungwüse gsi, ob und wie mir ds Lager wei düräfüährä. Er het Rägä gmolde gha. Bis am Abig am 9ni hete mir d Eltere sölä informiere u d Zyt isch gägä üsgloffe. Zersch heimers fasch welä absägä, när himer nomal di nüiiste Wättermodell gstudiert. U si zum Schluss cho, das mir üs uf ds Regewätter vorbereite u Spieli mitnehme. Ou heimer zum erste Mal es Partyzelt vor Janine Fischer dörfä bruche, so das mir chli meh schärmä hei wes chiem cho regne. Ou es Stromaggregat mit verschiedene Lampe hei mir mitgno, so das mir üses Lager im Stall vor Alphütte hete chönä witerfahre. U das hei mir jetz i de letschte Stund vorem Lager no dörfä organisiere... |
| 20 | Jugigiele hei am Lager teilgno. Mir si mitem Oehrli Roland Richtig Iffige gfahre. Di grössere si ir Ritzdole usgstiege u di chlinere hei bis i ds Iffige chöne fahre. Vo dert si mir BI SUNNESCHIN via Groppi/Hohberg i ds Pöris gloffe. . Ufem Pörisgrat hei mir üses Mittagesses usem Rucksack gnosse u aschliessend si mir ache zu üsem Lagerplatz gloffe. Dert hei mir als ersts üsi Zelt ufgstellt. Aschliessend si mir ga Holzsammle u hei üs am nahglegene Bächli vergnüägt. Mir hei afah ifüürä u Wasser für Tee choche. Als chlini Zwischeverpflegig hei mir Banane und Schoggi mitgno, u dermit d Giele la Schoggibanane mache. Na dem Zvieri hei mir Leiter e chline Parcours zum Thema „Luft“ vorbereitet. 5 verschiedeni Pöste hei im Team müglichst schnell, ruehig oder mit Köpfchen müäsä absolviert werde. Mir hei när ä Rangliste gmacht u jedes Team het es chlises Priisli (öpis Süäses) übercho. Nam Parcours hei d Buebe wieder Freizit gha. Ds Wasser vom Bächli het di meischte wieder azoge. Dert hei si Wassergstouet und si zum Teil ou dri gha Bade. Öpä am abig am Sächsi hei mir üsi beide Füürstelle frei gäh für ds brätlä. Bis zum dem Zitpunkt het sech dr akündet Rege, brav zrügg ghalte. Es isch troche blibe. Nam Znacht si d Giele wieder zum Bach gange u hei dert am Abig öpä am 9ni, ihres „Mitternachtsschwümme“ dürä gfüährt. Zum Teil hei si sogar äxtra Shampoo mitgno, u hei das i ds Bächli gleert. Viel gnützt hets nid, si si so oder so i brunem Wasser ghoket… Natürlich hets ou üses traditionelle Dessert wieder gäh. Üsi Schoggicreme. Zuesätzlich hets hüür no Muffins gäh, wo mir vomene Geburtstagschind hei gschenkt übercho. Wos de langsam dunkel isch worde hei mirs üs gmüätlich gmacht bim Füür. Dert hei mir no Witze u Gschichtli verzellt. Nadisna si d Giele ga liege churz nach Mitternacht si ou di letschte Giele im Zelt gsi. Pünktlich uf diä Zit wos liecht het agfange regne. Still ischs aber no es Zitli nid worde… Am Suntimorge vom 5i bis 6i hets zimli fest grägnet. Jedoch het das di einte nid ufghalte am morge am 6i uf ds stah u so de letschte Regetröpf hallo ds sege. Churz na de 6i am morge het ufghört regne. Mir hei wieder agfange ifüüre u hei di „bösä Brennnessle“ verbrennt so dass es zimlich fest grouchnet het… J, natürli heimer ou wieder überem Füür, Wasser kochet. Am 9ni am Morge hets zMorge gäh. Nam Zmorge hei mir afah ufrume. Wo dr Lagerplatz isch suber gsi, hei mir wi i de letschte Jahr wieder gstöcklet. Am 12i hei mir alles ufgrumt gha u hei üsi Wanderig achi i ds Dorf agfange. Mir si ufem Wanderweg zum Iffigefall gloffe. När ds Pöscheried fürä u achi i d Ey zur Brätlistell. Dert hets Zmittag gäh. Mir hei de Giele chalts Fleisch, Käse, Tomate, Brot parat gmacht so dass si sech hei chönä Verpflege. Na dr stündige Mittagspouse hei mir dr letscht Teil vo üsere Wanderig i agriff gno. Mir si via Lenkersee, Werkhof zum TEC gwanderet. Das alles het bi trochenem Wetter stattgfunde. Dert hets für jede Giel no ä Glace gäh, wo mir die hei gässä gha hei mir üs verabschiedet. Churz na dem di letschte Giele si abgholt worde het dr Petrus d Schleuse göffnet u es het zimli starch afah regne. Mir hei riesigs Wetterglück gha u dür das es unvergesslichs u lustigs Lager dörfä erläbä. Zum Glück hei mir ds Lager nid abgseit, mir wärä üs gröiig gsi. |
| Jetz no diversi Zahle zum Jugijahr 2014/2015 | |
| 2 | Zähn si bi unterschiedliche Giele im Jugilager usegheit, zum Glück beides Milchzähn wo scho gwaggelet hei. |
| 20 | jüngeri u 19 älteri Giele hei mir i ändi Jugijahr meh oder weniger regelmässig dörfä begrüäsä. |
| 4 | vo ihne si nume i eim Halbjahr ir Jugi gsi, da si im Summer schutte oder im Winter Ischhockey spiele |
| 33 | Mal hei mir üs troffe zum turne |
| 31 | Lektione ,wo ä Giel isch awäsend gsi, isch dr Rekord i dem Jahr bi de jüngere und |
| 30 | Lektione bi de ältere. |
| Summiert hei mir 523 jüngeri u 365 älteri Händ, bi üs ir Jugi, zur begrüässig dörfä schüttlä. | |
| 1287 | Lektione wärä müglich gsi, we ali Giele jedes Mal wärä awäsend gsi |
| 69% | vo de Giele hei mir im Durchschnitt pro Fritig dörfä begrüäsä. Das ergit ä Schnitt vo 26.9 Giele wo jede Friti si awäsend gsi. |
| Ds Minimum het am 22.05.2015 bi de Grosse stattgfunde, da hei mir nume 4 Giele dörfä begrüäsä. E grosse Teil vo de Giele isch den ir Landschuelwuche gsi oder grad zrügg cho. | |
| 2 | Nennensweärti Verletzige hei mir im letschte Jugijahr gha. 1 Leiter het sich es Band im Fuessglänk grisse u bim Unihockeyle het ä Giel ä Schlegel a Chopf übercho, so dass mir oder resp. d Eltere hurti i ds Spital hei müäsä gha d Wunde zue chläbä. |
| 10 | Sitzige hei insgesamt im Jugi Leiterteam stattgfunde. |
| Gsamthaft het das 27 Site Sitzigsprotokoll | |
| und e Sitzigsduur vo 21 Stund u 55 Minute ergäh. Ohni d Sitzige für ds nüiie Jugi T-Shirt grechnet, weme die derzue nimmt isch me bi | |
| 14 | Sitzige, mitere Protokolllängi vo 37 Site und ärä Sitzigsduur vo 28h und 20 Minute. |
| Alles in allem isch es 1 unvergessliches Jugijahr gsi wo mir hei dörfä erläbä, ds Jugijahr 2014/2015 | |
