Jahresbericht 2017 / 2018

I dem Bricht geits um d Jugi Knaben, weg dr eifachheit u gwohnheit hie nume ging als „d Jugi“ gnennt.

Mir si am 18. Ougste 2017 i ds nüiie Jugijahr gstartet. Mir hei 11 nüii Mitglieder dörfä begrüäsä u hei mit insgesamt 44 Buebe gstartet.

Am 08. September hei mir am Rollorama, wo i disem Jahr ar Lenk stationiert isch gsi, ä Bsuech abgstattet.

Am 24. September hei 11 Giele und 2 Leiter am Iffigelouf resp. KUSPO-Run mitgmacht. Das isch Azahlmässig für d Jugi ä nüiie Rekord. Zum erschte Mal si usserdem 2 Giele vom KUSPO bis i ds Iffige gsecklet. Si si unter eire Stund im Iffige acho und hei ä Superzyt gloffe. O ig als Leiter ha müäsä Gas gäh, dasi dene zwene no knapp ha dervo möge.
Am Namitag heimer mit 9 Buebe am KUSPO-Run mitgmacht. Vo allne Giele si insgesamt 4 uf ds Podest cho. Ali hei a däm sunnige Herbsttag ä super Leischtig zeigt.

Am 27. Oktober hets ä cooli Minitrampolinlektion ir Mehrzweckhalle gä. D Jungs hei richtig Vollgas gä u hei zum Teil dr Salto mitere ganze Schrube chöne stah. D Leiter hei nid grächnet, dass d Jungs so fit ufem Minitrampolin. si.

Am 17. November hei mir ar Ischbahn Lenk ä Bsuech abgstattet. Mir hei üs dert während 2 Stund bi Fangnis, Koordinativi Üäbige oder eifach bim Ischhockeyspiele ustobet.

Üsi traditionelli Jugiwienachte het am 15. Dezember 2017 stattgfunde. Mir hei 44 Giele dörfä begrüäsä u si mit ihne dür di wunderbar verschneiti Lenk zu dr Brätlistell bir Talstation Wallegg gloffe. Dert hets für jede Giel Tee, Cevelats, Brot, Mandarindli, Ärdnüssli und am Schluss no Schöggeli gäh, so dass mir üs hei chönä sterchä. Wülls i däm Jahr ändlich wieder mal het Schnee gha, ischs ä wildi Wienachte worde. D Jungs wi o äs paar Leiter hei zum Schluss wie wanderndi Schneemänner usgseh. ;-)

Am Samstimorge vom 20. Januar si mir wieder a Betelberg ga Böblä. Mit 28 Giele hei mir i chli meh als 2 Stund bis zu 5 Fahrte gmacht. O da ischs wieder ä wildi Sach gsi.

Am 2. Februar het üses Spiel und Spass im Schnee stattgfunde. Mir hei Rugby oder Fuessballgspiel oder si ganz eifach am Hang ga rutsche. Wüll dr Schnee sehr pulverig isch gsi, heimer hür nid so guet chönä Schanze boue u so het ä alti Boumwurzle als Schanzetisch müäsä härä ha.

Am 16. Februar heimer öpä 20 Giele im Schwingkeller ds St.Stephan dörfä begrüäsä. Mir hei wieder dr Jungschwingertrainer Chrigel Schenk organisiert wo üsä ä spannende Iblick i Schwingsport het gäh.

Am Sunti, 25. März 2018 het na 10-mal trainiere am Zischtigabig ds Unihockeyturnier ds Langnau stattgfunde. Mir si wi i dä letschtä Jahr wieder mit 2 Mannschafte uf Langnau greist. Dert hei beidi Mannschafte 6 Spiel chönä absolviere.
Di jüngeri Mannschaft het 4 Gruppespiel u 2 Rangierigsspiel gha. Si hei ds Turnier ufem 5.te Rang beendet.

Ar ältere Gruppe isch es chli besser gloffe, si hei 6 Gruppespiel gha. Für jede Sieg hets 3 Pünkt gä u fürnes Unentschiede 1 Punkt. Si hei eis Spiel verlorä 4 Siege u 1 Unentschiede erspielt. U so isch di älteri Gruppi i däm Jahr wieder ufem Podest gstande. Si hei säch ufe zweit Platz kämpft.
Als Dank fürä Isatz i dä Trainigs u im Turnier simer vor dr Heireis ds Langnau no i McDonalds u hei üs gstärcht für d Heimfahrt a d Lenk. D Jungs chöis albe chum erwarte we wieder ds Unihockeyturnier vor dr Türe steit.

Am 25. Mai 2018 isch ds Bike ufem Programm gstande. Dr Martin het ä super Lektion us denkt wo mir bim Bahnhof ufem Platz vor alte Landi hei absolviert. Leider isch äs gägä ds Änd vo dr jüngere Gruppe starch cho rägnä, so dass mir när ds Bike mit dä grössere hei müäsä absägä.

Am 1. Juni 2018 heimer Bsuech us Langnau gha. Dr Michael Tanner isch bi üs ä Abig cho leite. Mir hei Softhandball und Smoolball gneuer agugget u hei ä lustige Abig gha. Dr Michu winer o gnennt wird hei dr Stefan und Dominik am Leiterkurs, als Leiter vo dem Kurs, im 2010 kenneglehrt. Dank ihm dörfä mir mit dä Giele ou jedes Jahr uf Langnau a ds Unihockeyturnier reise.

Am Wucheend vom 09. und 10. Juni 2018 hei mir 15 älteri u 3 jüngeri Giele i üses traditionelle Lager dörfä begrüäsä. Mir hei üs am morge am halbi nüni troffe u hei üs sofort ufä wäg gmacht richtig Lagerplatz. Di ältere si vom Bahnhof via Schanzestrass – Metschstrass – Nässli a Lagerplatz im underem Birg aglangt. Mit Musig us dä Böxli si i däm Jahr di ältere sehr kompakt u zügig gloffe. Di jüngere si bis ufe Metsch chauffiert worde u hei vo dert di glichi Route under d Füess gno. Wo mir am Lagerplatz si acho heimer üsi Zält ufgstellt. När simer ga Holz sammle so dass mir üsi Lagerfüür hei chönä i Betrieb näh. Mir hei üs richtig gmüälich igrichtet u so si ufem Lagerplatz plötzlich 5 Böim desumegstande wo vorher no nid si da gsi, si si gstande u nid glägä…
Na däm isch üses disjährige Programm gstartet. Mir Leiter hei ä Jugiolympiade mit 16 verschiedene Spieli vorbereitet. Äs si jewils 4 Gruppe bildet worde wo so um Pünkt kämpft hei. Am erste Lagertag si 8 Diszipline wi Distanze schätze, Hindernislouf dürä Wald oder Teebüteliwitwurf i 2 Stund absolviert worde.
Wo mir das hei gmacht gha, hei d Giele Freizyt gha. Si si zumene Bächli ga Wasser stoue, hei gschuttet oder si gmüätlich am Lagerfüür ghocket.
Am 7ni hei mir d Füürstelle freigäh für ds Brätlä. Bi Sunneschiin si üser Fleischstück ufem Grill zuebereitet worde.
Nachem Znacht heimers üs am Lagerfüür gmüätlich gmacht, bis es am halbi Nüni plötzlich isch cho rägnä. Ä churze Gutsch heimer zersch gmeint, leider ischs när bis am 23.15 gange bis es definitv isch troche blibe. D Leiter hei grad wölä ga liege, wo a dä Lagerfüür wieder richtige Betrieb isch ufcho.
Di meischte Leiter hei sech aber nid la dervo abhalte u hei när ihres Zelt ufgsuecht.
Anderi Leiter si no bis am halbi drüü am Füür mit dä Giele irä gmüätliche Rundi ghocket. Wo de o dr letscht Leiter isch ga liege, si d Jungs richtig uftouet. Anes erholsams schlafe nid ds dänkä gsi. U drum bi si di erschte Leiter am halbi 5i am Morge wieder ufgstande. Am Füür heimers üs wieder bequem gmacht, u hei dr Tag lah erwache.
Wo alli si wach gsi, hets Zmorge gä. Nam Zmorge heimer a üsere Olympiade witergmacht. Hüt si Diszipline wi, Luftballon zimlich gnau na eire Minute mit dr Velopumpi verchlöpfe, Eierlouf oder Kegle ufem Programm gstande.

Na dr Olympiade hei mir Leiter no ä Trumpf usem Ärmel packt. Hüür hets zum Zmittag Burger gäh wo mir uf üs nä Füürstelle zuebereitet hei. Wo mir fürä räschtä vom Lager si gstärcht gsi, heimer scho wieder müäsä ufrume. Verrukt, ä riesgä Ufwand für knappi 24 Stund.
Wo dr Lagerplatz isch ufgrumt gsi u dr Bus wieder isch belade gsi, heimer d Rangverkündigung vor Olympiade dürä gfüehrt, na däm hei mir no ds Gruppefoto gmacht u hei im Aschluss d Rucksäck bugglet u si richtig Simmefall gloffe.
Wo mir dert si acho hets für alli als Abschluss no ä Glace gäh. Am Vieri am Namitag isch ds Lager verbii gsi. D Giele si überglücklich aber zum teil ou Todmüed vo dä Eltere i Empfang gno worde. Dermit isch üses Jahreshiglight scho umi verbii gsi.

Am 22. Juni 2018 heimer üs zum letschte Mal i däm Jugijahr troffä. Mir hei a däm Abig 3 Jugigiele dörfä verabschiede. Di giele si 5, 8 und sogar 9 Jahr ir Jugi gsi. Mitemene chline Gschänkli heimer si us dr Jugi verabschiedet.

Im Normalfall hei mir üs ir Mehrzweckhalle zum turne troffe. Mir hei am Ändi vom Jugijahr 48 Giele ir Jugi gha. Das si 12 meh als im Vorjahr. Zwischenzitlich si sogar 49 Giele ir Jugi gsi. Im Schnitt hei mir 35.59 Giele pro Abig dörfä begrüsä, oder anders usdrückt si 74.15% vo allne Giele jede Fritig ir Halle awäsend gsi. Über ds ganze Jugijahr hei mir 1193 Händ zur Begrüässig dörfä schüttlä.

U dermit isch üses Jugijahr ds Änd gange. Äs isch, us mire Sicht bis jetzt ds schwirigste u turbulentiste Jugijahr gsi. Mit z.T. 25 Giele i eire Gruppe het me ir Mehrzweckhalle nüme normal chönä turne. U us däm Grund hei mir Leiter müäsä reagiere u lösige sueche.
Mir hei ds nüiie Jugijahr 2018/2019 nüii i drü Gruppe gstartet. Di ältiste Giele vor 8. Und 9. Klasse si nüii vom 20.05-21.35 am Fritig am Abig ir Halle.
Bis zum hütige Stand beröie mir dä Schritt nid, d Jungs chöi säch ir Halle wieder viel meh ustobä und mir chöi d Lektione besser am Alter entsprechend apasse u hei o ä bessere Überblick was ir Halle geit. U drum isch ds nüiie Jugijahr im verglich zum alte richtig ruehig.

                                                                                                                                                Januar 2019 / Dominik Buchs

 Hie no es paar Zahle us dr Statistik vor Jugi:

Juli 2018 / Dominik Buchs